Oitritts-Ermunterung zum Danze

Was habt ehr eich so gut entschiede,
net owends rumzuhänge, miede.
Ehr wollt jetzt danze, siss so gesund,
viel besser als lese, wumeglich noch Schund!
Ach Gott nee, ehr werd eich so schäh beweeche:
Ehr drickt eich zesamme un aach mol dageeche.

Un schä Musik gibt’s immer dezu.
Werscht sehe, die Zeit geht rum im Nu.
Un nette Leit hots do, jede Menge.
Hoscht aach viel Platz, sgibt kä Gedränge.
Die Trainer sin gut un nemme sich Zeit.
Siss werklich schä, fer alle Leit!

 Ehr habt ä gute Wahl gedroffe.
Siss niemols änner vollgesoffe.
Sinn hibbsche Fraue, manch schäner Mann.
Un jeder hift mit, so gut wie er kann.
Jetzt geht ämol immer frehlich danze!
Swerd eich gefalle, im Große un Ganze.

Werner Kurze, Neuhofen, 03.02.2010

Austritts-Ermunterung vum Danze

Danze, danze, danze, danze!
Des geht mer uff de Keks das Ganze.
Was hemmer gedanzt, was hemmer geschafft!
Doch jedes Mol ä Licke klafft
zwischen dem, wies hätte soi gesollt
un dem, was mer henn grade gewollt.

Siss aus, mer heere jetzert uff
un leischde uns ä kleene Suff.
Mer gehe grad un dschogge schäh
bei Daacheslicht im Wald, werscht säh!
Un worke kemmer aach dezu.
Des reicht fer uns, dann hemmer Ruh!

Drum saach mer Tschüss jetzt aach ehr Leit,
denn alles hot so seine Zeit.
Ne Zeit lang hemmers schäh gefunne,
doch jetzert hemmers iewerwunne.
Wann schpäter eier Knie aach weich,
dann kummt ehr zu uns, mehr freen uns uff eich!

Werner Kurze, Neuhofen, 03.02.2010

© 2008-2012 by odmSoft